----------{ اليوم مال العمر }-----------
----------------------------------------
اليوم مال العمر وختير شبابو
............ سبعة مع الستين دقو على بابو
متل غصن الورد هرهرو الورقات
............. والشيب غازي الراس كلل جنابو
مر العمركلو بالتعب والحسرات
............. وحلم الفرح غفيان فاقد صوابو
هيك العمر بيمر قصص وحكايات
............... كترت اخبار وشعر كبّر كتابو
ياترى رضيو عليي الاهل والرفقات
............... وكان مخلص وفي لكل اصحابو
ياترى راضي الوطن بالدمع والكلمات
............... انشالله حروف الشوق نتيجتن جابو
يازمن هدي شوي خفف الدورات
............... الجسم تعب كتير والعزمات دابو
حتى شوف العين خف بالنظرات
............... والقلب غير كترة الحسرات مانابو
يازمن وقف هون ماعاد في كلمات
............... بعدو شقي هالقلب وحروف ماتابو
بعدو بيكتب غزل بيعاكس الحلوات
............... وبعدو القلم عشقان بيدلل حبابو
وبعدا حروف الشوق بتنزل الدمعات
............... وبعدو ولادو بعاد ناطر على بابو
يارب بدي حواليي شوف الوليدات
............... وبعدا لعمر يوقف ويطوي تيابو
----------------------------------------------
صباح المحبة والعيد
كل الاصدقاء
كل عام وانتم بخير
يوم جديد في العام السابع والستين من عمري الشقي
ليست هناك تعليقات:
إرسال تعليق