يااااااريت ....
يا ريتنا بقينا ع الشَّط
ولا سْبحنا ولا غمّقنا
كنّا بقينا مرتاحين
ولا ببحر الحبّ غرقنا ...
سحبتنا الموجة لبعيد
لا قرّرنا ونفّذنا
استسلمنا من دون تعقيد
صدق العشقْ اللي جَرّنا ...
ما تخّيلنا وحوش البحر
عم تنطر تا تقطّعنا
وتملّينا دموع وقهر
وبين سنانها تفرّقنا ...
ياريتنا ما جازفنا
ولا فرّطنا بصحبتنا
وبقيت نهدات القلبين
ناي وكلمة تجمّعنا ...
الله يسامح هالأيام
شو انقهرت لمّا فرحنا
مكتوب علينا الأحلام
من غفوتنا تحرمنا ...
راجعين للشجرة والشطّ
اللي بأغصانها ضمّتنا
نقلّها توبة ما بقى ننطّ
الدرس القاسي تعلّمنا ...
عامر ...
ليست هناك تعليقات:
إرسال تعليق